Ish-banori i “Big Brother Albania” dhe këngëtari i njohur, Kelly, ka ndarë lajme pozitive për fansat e tij pas disa muajsh mungesë nga skena muzikore për shkak të problemeve shëndetësore. Pak kohë më parë, artisti u përball me një paralizë faciale, që preku gjysmën e fytyrës dhe të qafës, duke ndikuar gjithashtu edhe në kordat zanore dhe duke e detyruar të tërhiqej nga koncertet dhe aktivitetet publike.
Në një video të fundit të publikuar në Instagram, Kelly duket dukshëm më mirë dhe ka treguar se procesi i rikuperimit po ecën më shpejt se sa kishte pritur. “Jam në fazën e rikuperimit, që ka ndodhur në një kohë rekord. Shpresoj të shihemi së shpejti në projekte të reja”, tha ai, duke i dhënë shpresë ndjekësve që mezi presin rikthimin e tij në muzikë.
Fansat kanë reaguar menjëherë me mesazhe mbështetëse dhe urime për shërim të shpejtë, ndërsa Kelly shpreh vendosmërinë për t’u rikthyer fuqishëm me projekte të reja, duke treguar se pasioni për artin nuk e ndal as nga sfidat shëndetësore.