Geraldo dhe Rozafa, një çift i ri nga Shqipëria, u bënë së fundmi prindër të katërnjakëve – tre djemve dhe një vajze – një bekim i madh, por i shoqëruar me sfida të rënda shëndetësore. Të katër foshnjat kanë lindur me probleme serioze në sy dhe rrezikojnë humbjen e përhershme të shikimit nëse nuk marrin trajtim të menjëhershëm jashtë vendit.
Sipas raportimit të Noa.al, dy prej bebeve kanë hemorragji në sy si pasojë e çarjes së arterieve, ndërsa dy të tjerët mund të përballen me të njëjtën gjendje nëse ndërhyrja nuk kryhet në kohë. Mjekët rekomandojnë dërgimin urgjent të foshnjave në një qendër të specializuar ndërkombëtare për operim dhe trajtim të avancuar.
Familja nuk ka mundësi të mbulojë shpenzimet e konsiderueshme që kërkon ky trajtim. Për këtë arsye, prindërit kanë hapur një faqe GoFundMe me qëllim sigurimin e rreth 100 mijë eurove, shumë e cila do të mundësonte ndërhyrjet mjekësore të domosdoshme për shpëtimin e shikimit të katër fëmijëve.
Ata u bëjnë thirrje të gjithë shqiptarëve brenda dhe jashtë vendit të kontribuojnë, me shpresën se çdo ndihmë do të sjellë më afër mundësinë që katërnjakët të marrin trajtimin që u nevojitet para se të jetë tepër vonë.