Regjistrimet për nxënësit që do të nisin klasën e parë dhe të dhjetë në vitin shkollor 2025-2026 vijojnë të jenë të hapura dhe do të mbyllen më 1 Shtator. Procesi kryhet online, në platformën zyrtare e-Albania.
Ministrja e Arsimit, Ogerta Manastirliu, gjatë një vizite në shkollën e re “Gaqi Karakashi” në Kuçovë – një nga 30 shkollat që do të hapin dyert më 8 Shtator – u bëri thirrje prindërve të përmbyllin sa më shpejt regjistrimin e fëmijëve.
“Njoftim i rëndësishëm për të gjithë prindërit – regjistrimet në klasat e para dhe të dhjeta janë të hapura në e-Albania deri më 1 Shtator. Ju lutem, përfundoni regjistrimin e fëmijëve tuaj brenda këtij afati. Është një proces që merr vetëm disa minuta,” – u shpreh ministrja.
Manastirliu shtoi se aplikimi online ka për qëllim lehtësimin e procedurave, shmangien e radhëve në shkolla dhe garantimin e një procesi transparent dhe të aksesueshëm për të gjithë prindërit dhe nxënësit.