Barnat e krijuara për humbje peshe, të cilat po fitojnë popullaritet tek njerëzit, mund të përdoren së shpejti edhe për kafshët shtëpiake, raporton CBS News.
Kompania bioteknologjike “Okava Pharmaceuticals”, me seli në San Francisko, ka nisur studimin klinik MEOW-1, gjatë të cilit 50 maceve u vendos një implant i vogël nën lëkurë për t’u furnizuar për gjashtë muaj me një ilaç të tipit GLP-1.
Sipas CEO-së Michael Klotsman, implanti OKV-119 është projektuar të riprodhojë efektet fiziologjike të agjërimit — rritjen e ndjeshmërisë ndaj insulinës, uljen e masës dhjamore dhe përmirësimin e metabolizmit të energjisë — pa ndryshuar rutinat ushqimore të kafshëve dhe pa cenuar marrëdhënien pronar–kafshë, e cila shpesh lidhet ngushtë me ushqimin.
Kompania beson se ky trajtim mund të rrisë cilësinë e jetës së maceve dhe të nxisë plakjen e shëndetshme. Aktualisht, rreth 60% e maceve në SHBA konsiderohen të mbipeshë.
Dr. Ernie Ward, ekspert i obezitetit tek kafshët, theksoi se për dekada të tëra rekomandimi kryesor ka qenë reduktimi i ushqimit — një qasje që nuk funksionon për të gjitha format e mbipeshës. Ai shtoi se, bazuar në të dhënat nga përdorimi i ilaçeve GLP-1 tek njerëzit, përfitimet mund të shtrihen edhe tek rreziku i diabetit dhe shëndeti afatgjatë.
Sipas “Okava”, trajtimi pritet t’u kushtojë pronarëve rreth 100 dollarë në muaj. Rezultatet e studimit MEOW-1 do të publikohen verën e ardhshme, ndërsa kompania synon të kërkojë brenda dy viteve miratimin e FDA-së për përdorim tek macet — dhe më pas edhe tek qentë.