Një ngjarje e rëndë është regjistruar paraditen e sotme pranë zonës së Shkëmbit të Kavajës në Durrës, ku dy turistë që po lundronin me motor uji kanë pësuar një aksident në det. Si pasojë, një prej tyre ka humbur jetën, ndërsa tjetri ndodhet në gjendje të rëndë në spital.
Sipas informacionit paraprak nga Policia e Kufirit, rreth orës 11:15, një patrullë detare ka konstatuar dy persona në det që kishin rënë nga një mjet lundrues “Jet Ski” dhe ka ndërhyrë menjëherë për t’i transportuar drejt bregut.
Viktima është një 34-vjeçar me shtetësi ganez dhe rezidencë në Angli. Ai u shpall i pajetë nga ekipi i urgjencës sapo mbërriti në portin e Durrësit. Ndërkohë, shoqëruesja e tij, një 31-vjeçare, po ashtu nga Gana dhe me banim në Angli, u dërgua me urgjencë në spital në gjendje kritike për jetën.
Dyshohet se gjatë lundrimit me motor uji, ata kanë humbur kontrollin mbi mjetin për shkak të manovrave të pasakta, çka çoi në rënien e tyre në det.
Policia dhe prokuroria kanë nisur hetimet për të sqaruar rrethanat e plota të aksidentit dhe për të kryer verifikimet e nevojshme.
Njoftim i Policisë:
Durrës/Informacion paraprak
Rreth orës 11:15, të datës 01.06.2025, shërbimet e Policisë Kufitare Port Durrës janë njoftuar se, në zonën përballë Shkëmbit të Kavajës, dy shtetas që lundronin me një mjet lundrues Jet Ski, dyshohet se gjatë manovrave kanë humbur kontrollin mbi mjetin lundrues dhe kanë rënë në ujë.
Shërbimet e Policisë Kufitare, pas njoftimit të marrë, kanë shkuar me mjet lundrues menjëherë në ndihmë të dy shtetasve që kishin rënë në ujë, duke bërë transportimin e tyre për në port, me qëllim transportimin drejt spitalit. Nga verifikimet paraprake të ekipit të urgjencës së spitalit, që ishte në pritje në port, rezultoi se njëri prej shtetasve që lundronin me Jet Ski, konkretisht shtetasi S. O., 34 vjeç, banues në Angli, kishte humbur jetën, ndërsa shtetasja V. B., 31 vjeçe, banuese në Angli, u transportua menjëherë për në spital në gjendje të rëndë shëndetësore.
Menjëherë është ngritur një grup i posaçëm hetimor dhe nën drejtimin e Prokurorisë vijon puna për zbardhjen e rrethanave dhe dokumentimin ligjor të rastit.