Prokuroria e Fierit ka përfunduar hetimet dhe ka dërguar për gjykim mjekun toksikolog L.B. dhe infermierin E.M., të akuzuar për “Korrupsion pasiv i personave që ushtrojnë funksione publike” dhe “Shpërdorim detyre”, parashikuar nga nenet 259 dhe 248 të Kodit Penal.
Sipas hetimeve, mjeku L.B. kishte lëshuar recetë për medikamentin “Metadon” një shtetasi që pretendonte se ishte përdorues i lëndëve narkotike, pa kryer analizat përkatëse dhe pa pasur rekomandim nga mjeku i familjes, në këmbim të përfitimeve materiale.
Ndërkohë, infermieri E.M. akuzohet se ka shpërndarë Metadon në sasi të dyfishtë, bazuar vetëm në një recetë, pa respektuar protokollin mjekësor dhe pa pasur kartelë mjekësore për pacientin, gjithashtu në këmbim të përfitimeve materiale.
Prokuroria e Fierit thekson angazhimin e saj për të ndjekur penalisht çdo zyrtar publik që abuzon me detyrën në këmbim të përfitimeve të paligjshme.