TIRANË– Trajneri i Kombëtares shqiptare, Silvinjo doli në konferencën e zakonshme për shtyp pas fitores kundër Letonisë. Ai u shpreh i lumtur për 3 pikët ndaj një kundërshtari të vështirë. Ndër të tjera braziliani theksoi se do të punojnë fort për ndeshjen e tetorit kundër Serbisë.
“Do të punohet patjetër dhe për ta fituar ndeshjen e radhës, por është një ekip i vështirë. Është një lexim i saktë i lojës nga ana jonë, kjo është puna, ti dërgojmë lojtarët në 30 metrat e fundit, por më pas varet edhe nga cilësitë individuale të lojtarit. Në futbollin e sotëm modern përgjithësisht mbrohen mirë dhe është bërë akoma më e vështirë për të shënuar, mendoj që kemi bërë një ndeshje të mirë, mendoj se kishim disa situata ku mund ta mbyllnim ndeshjen më shpejt, por kishim një kundërshtar relativisht të vështirë.
I patëm parë ata dhe në ndeshjen kundër Serbisë ku një episod mund të kishte ndryshuar lojën, janë një skuadër e mirë, fizikisht e fortë dhe të krijon një situatë të vështirë sepse luftojnë deri në fund për rezultatin. 5 minutat e fundit bëmë një ndryshim moduli me Kumbullën, mund ta bënim më herët, por menduam që mund ti sillnim në zonën tonë, por e rëndësishme është që kemi marrë 3 pikë në një ndeshje të vështirë dhe në vazhdim do të mendojmë për tetorin. Kemi bërë një hap të rëndësishëm përpara sepse është ndeshja e parë që ne e fitojmë, e thash dhe dy ditë më parë që kjo është ndeshje kyçe për rrugëtimin në Botëror, e kemi merituar, kemi fituar 3 pikët, jemi ende në garë, e thamë që ishte ndeshje deçizive dhe e vështirë për tu luajtur, jam shumë i kënaqur me çdo gjë, me vendin, federatën, lojtarët e mi, jam krenar për ta dhe për atë që kanë bërë.
Të kualifikohesh në Europian është e vështirë por për një Botëror është akoma më shumë dhe ju e dini shumë mirë këtë gjë, por e rëndësishme është që kemi ardhur në tetor dhe jemi ende në garë, do ti shijojmë pak ditët në vijim dhe më pas do të fillojmë punën. Është shumë herët për të folur për ndeshjen me Serbinë, sepse sapo kemi mbaruar një ndeshje. Është akoma shumë e nxehtë nga një ndeshje shumë e vështirë nga e cila nëse nuk do të merrnim 3 pikë, nuk do të diskutonim më për ndeshjen e radhës. Ne na duhet të menaxhojmë lojtarët tanë, kemi akoma përpara një muaj ku duhet të përgatitemi shumë fort dhe do të provojmë të japim një ndeshje shumë të mirë. Unë besoj që duhet të flasë fusha për 90 minuta”. përfundoi Silvinjo./PanoramaSPORT
Bllokimi i 8 ton domate me pesticide/ Identifikohen inspektorët e AKU-së që lejuan eksportimin