Ivanka Trump, vajza e ish-presidentit amerikan Donald Trump, ka ndarë me ndjekësit një përmbledhje të udhëtimeve të muajit qershor përmes një albumi fotografik në rrjetet sociale, ku përfshihet edhe një ndalesë e shkurtër në Shqipëri.
Ivanka, e shoqëruar nga bashkëshorti i saj Jared Kushner dhe tre fëmijët, vizitoi qytetin bregdetar të Vlorës më 26 qershor, disa ditë para se të merrnin pjesë në dasmën luksoze të Jeff Bezos dhe Lauren Sanchez në Venecia.
Familja Trump kaloi disa orë në gjirin e Vlorës me një jaht, ku shijuan peizazhin dhe konsumuan darkë në një restorant lokal. Ata gjithashtu fotografuan perëndimin e diellit me sfond ishullin e Sazanit, një vend që pritet të shndërrohet në destinacion turistik luksoz përmes një projekti investimi prej 1.4 miliardë eurosh.
Ky projekt dhe një tjetër në Zvërnec janë propozuar nga “Affinity Partners”, kompania e investimeve e drejtuar nga Jared Kushner, e cila mbështetet financiarisht nga fondi sovran i Arabisë Saudite. Vizita në Shqipëri, megjithëse e shkurtër, është përfshirë në mënyrë të veçantë në albumin “Mirupafshim Qershor”, të postuar nga Ivanka Trump.