Qeveria italiane ka miratuar rregulla të reja të ashpra për ndotësit që hedhin mbeturina nga automjetet, me gjoba që shkojnë deri në 18,000 euro. Në zonat e mbrojtura, shkelësit rrezikojnë edhe arrestimin.
Nga pecetat dhe kanaçet e deri te shishet e qelqit apo qeset me mbeturina, çdo send i hedhur nga një makinë në lëvizje ose e parkuar konsiderohet shkelje serioze. Autoritetet kanë nisur monitorimin me kamera, ndërsa gjobat u dërgohen drejtuesve të mjeteve në adresën e tyre vetëm disa ditë pas shkeljes.
“Kjo nuk është vetëm çështje etike urbane”, theksoi Luigi Altamura, komandant i policisë lokale të Veronës dhe përfaqësues i ANCI-t për trafikun rrugor. “Një mbeturinë e hedhur nga dritarja mund të godasë një motoçiklist, të shkaktojë një frenim të rrezikshëm apo të bllokojë pusetat duke dëmtuar mjedisin. Tani kemi mundësi të ndërhyjmë më me efikasitet.”