Andrea Pirlo është emri më i fundit që i është shtuar listës së kandidatëve për të marrë drejtimin e kombëtares italiane, duke u kthyer në një surprizë në garën për pankinën e “Axurrëve”.
Sipas raportimeve, ish-mesfushori legjendar gëzon mbështetjen e Paolo Maldinit dhe Leonardos. Maldini e kishte përzgjedhur Pirlon për të drejtuar Milanin në vitin 2023, ndërsa Leonardo kishte tentuar ta afronte si futbollist te Paris Saint-Germain në sezonin 2011-2012.
Në moshën 47-vjeçare, Pirlo ka krijuar tashmë një eksperiencë si trajner. Aktualisht ai drejton një skuadër në Dubai, ndërsa më parë ka qenë në pankinën e Juventusit, Fatih Karagümrük dhe Sampdorias. Mbështetësit e kandidaturës së tij vlerësojnë njohjen e thellë të futbollit italian, si edhe idetë dhe personalitetin që ai mund të sjellë në krye të përfaqësueses.
Ndërkohë, gara për postin e trajnerit mbetet e hapur. Emri i Pep Guardiolës vazhdon të konsiderohet si ëndrra e madhe e drejtuesve, edhe pse realizimi i një marrëveshjeje me të shihet i vështirë. Në listë vijojnë të jenë edhe Antonio Conte dhe Roberto Mancini.
Brenda fundjavës pritet që Paolo Maldini dhe Leonardo të përcaktojnë drejtimin që do të ndjekin, ndërsa vendimi përfundimtar do t’i takojë presidentit të Federatës Italiane të Futbollit (FIGC), Giovanni Malagò.