Ish-shefi i krimeve në Komisariatin nr. 3 në Tiranë, Erjon Dani, është vetëdorëzuar në policinë e Himarës, pasi mësoi nga mediat se ndaj tij ishte lëshuar një urdhër-arresti nga SPAK.
Dani akuzohet për ndikim të paligjshëm ndaj funksionarëve publikë dhe shpërdorim detyre, gjatë kohës që ushtronte funksionin e tij në Policinë e Shtetit.
Ai është një nga të dyshuarit në kuadër të një operacioni të gjerë antidrogë të udhëhequr nga SPAK, që çoi në arrestimin e 8 personave për trafik ndërkombëtar të kokainës, kanabisit dhe heroinës, ndërsa 5 të tjerë mbeten ende në kërkim.
Hetimet janë mbështetur mbi komunikimet e enkriptuara të zbërthyera nga platforma “Sky ECC”, e cila u përdor nga grupi për të organizuar trafikun nga Amerika Latine drejt vendeve të Bashkimit Europian.