Gjykata rajonale në Verden dënoi këtë të mërkurë 67-vjeçaren Daniela Klette me 13 vite burg, pasi e shpalli fajtore për gjashtë grabitje të rënda, një tentativë grabitjeje, shkelje të ligjit për armët, rrëmbim dhe zhvatje.
Sipas aktakuzës, Daniela Klette, së bashku me bashkëpunëtorët e saj Burkhard Garweg dhe Ernst-Volker Staub, organizuan grabitje të automjeteve të transportit të parave dhe supermarketeve në rajonet e Saksonisë së Poshtme dhe Nordrhein-Westfalen gjatë periudhës 1999–2016, duke përfituar mbi 2.7 milionë euro.
Dy bashkëpunëtorët e saj vazhdojnë të jenë në arrati dhe kërkohen nga autoritetet gjermane.
Sipas transmetuesit publik Norddeutscher Rundfunk, menjëherë pas shpalljes së vendimit pati tensione në sallën e gjyqit, pasi mbështetës të të dënuarës protestuan dhe refuzuan të largoheshin nga ambientet e gjykatës.
Daniela Klette u arrestua në Berlin në vitin 2024, pas dyshimeve se kishte jetuar e fshehur për më shumë se 30 vite. Gjatë kontrollit në apartamentin e saj, autoritetet sekuestruan para cash, ar dhe armë zjarri. Procesi gjyqësor ndaj saj nisi në mars të vitit 2025.