Autoritetet iraniane kanë refuzuar çdo mundësi për bisedime të reja me Shtetet e Bashkuara mbi programin bërthamor, nëse më parë nuk ndalen sulmet izraelite ndaj territorit të tyre. Kjo është bërë e qartë gjatë takimeve të fundit mes delegacionit iranian dhe përfaqësuesve evropianë në Gjenevë, raporton CNN.
Sipas një zyrtari perëndimor të njohur me detajet e bisedimeve, Teherani ka kushtëzuar çdo nisje negociatash me një ndalim të menjëhershëm të sulmeve ajrore të Izraelit. Zyrtarët evropianë kanë shpjeguar se SHBA nuk ka kontroll të drejtpërdrejtë mbi veprimet ushtarake të Izraelit, por kanë premtuar se do t’i përcjellin Uashingtonit mesazhin e Iranit.
Në anën tjetër, Irani ka lënë të kuptohet se nëse ndalohet përkohësisht edhe shkëmbimi i zjarrit nga ana e tij ndaj Izraelit, mund të krijohet hapësira për bisedime direkte me amerikanët.
Sipas CNN, Shtetet e Bashkuara e kanë bërë të qartë se ndalimi i plotë i pasurimit të uraniumit nga Irani mbetet kushti kryesor për çdo marrëveshje të mundshme dhe për hapjen e bisedimeve të reja.