Organizata e Energjisë Atomike e Iranit njoftoi se Shtetet e Bashkuara kanë goditur Centralin Bërthamor të Darkhovinit, një impiant që ndodhet ende në fazën e ndërtimit në jug të vendit, pranë kufirit me Irakun.
Sipas autoriteteve iraniane, sulmi u krye në orët e para të mëngjesit dhe kishte në shënjestër kantierin ku po ndërtohet centrali.
Punimet për projektin rifilluan në fund të vitit 2022, kur Organizata e Energjisë Atomike e Iranit njoftoi nisjen e punimeve bazë. Megjithatë, sipas Shoqatës Botërore Bërthamore, deri në muajin mars ndërtimi i plotë i centralit nuk kishte nisur ende.
Planet për ndërtimin e një centrali bërthamor në Darkhovin datojnë që përpara Revolucionit Islamik të vitit 1979. Projekti filloi në vitet 1970 me mbështetje financiare franceze, por u ndërpre pas revolucionit, kur Franca u tërhoq nga investimi.
Në vitet 1990 pati edhe një përpjekje për ta ringjallur projektin me investime kineze, por edhe kjo nismë u ndërpre përpara rifillimit të ndërtimit.
Autoritetet iraniane nuk kanë dhënë ende detaje mbi dëmet e shkaktuara nga sulmi, ndërsa nuk ka pasur reagim zyrtar nga SHBA lidhur me pretendimet e Teheranit.