Ministri iranian i Naftës, Mohsen Paknejad, njoftoi se Irani do të ndërtojë një central të ri bërthamor, projekt që do të financohet me një kredi të siguruar nga Rusia. Lajmi u bë i ditur gjatë takimit përmbyllës të Komisionit të 18-të të Përbashkët të Bashkëpunimit Ekonomik Iran-Rusi, që u mbajt në Moskë.
Sipas agjencisë zyrtare IRNA, Paknejad theksoi se bisedimet mes dy vendeve u zhvilluan në një frymë miqësie dhe mirëkuptimi. Ai shtoi se bashkëpunimi do të vazhdojë në ndërtimin e centraleve të reja bërthamore, si dhe në përfundimin e fazës së dytë dhe të tretë të centralit ekzistues të Bushehrit.
“Bazuar në marrëveshjen e re, një central i ri bërthamor do të ndërtohet në Iran me financim nga Moska,” deklaroi Paknejad.
Ministri iranian kujtoi gjithashtu marrëveshjet e mëparshme me Rusinë për bashkëpunimin në sektorët e naftës dhe gazit, duke përmendur projektet me vlerë 4 miliardë dollarë që synojnë zhvillimin e shtatë fushave të naftës.
Gjithashtu, ai nënvizoi se gjatë takimeve u arritën marrëveshje për zgjerimin e bashkëpunimit në sektorët bankar, tregtar, bujqësor, shëndetësor dhe doganor, me synim lehtësimin e shkëmbimeve tregtare mes dy vendeve.
Në nëntor 2022, Irani kishte nënshkruar gjithashtu marrëveshje me Rusinë për ndërtimin e linjave të transmetimit të gazit natyror dhe zhvillimin e fushave të gazit.