Irani ka ndërmarrë një kundërsulm të menjëhershëm ndaj Izraelit, duke lëshuar raketa që kanë shkaktuar aktivizimin e sirenave të alarmit në disa pjesë të vendit. Ushtria izraelite konfirmoi se forcat ajrore janë duke kryer operacione në terren për të neutralizuar kërcënimin.
“Forcat tona po veprojnë aty ku është e nevojshme për të garantuar sigurinë e qytetarëve tanë,” tha një zëdhënës i ushtrisë. Ndërkohë, autoritetet u kanë bërë thirrje qytetarëve të ndjekin udhëzimet e Komandës së Sigurisë së Brendshme, që përfshijnë qëndrimin pranë strehimoreve, shmangien e tubimeve dhe kufizimin e lëvizjes.
Në qytetin bregdetar Bat Yam, në jug të Tel Avivit, situata është tensionuar ndjeshëm pas sinjalizimeve për sulm të mundshëm. Paniku ka përfshirë rrugët, ku qytetarët janë parë duke vrapuar dhe kërkuar strehim. Edhe pse një urdhër zyrtar për të hyrë në strehimore nuk është lëshuar ende, shumë banorë kanë zgjedhur të futen vetë, duke ndjekur instinktin e mbijetesës.
Atmosfera në zonat e prekura është tejet e tensionuar, teksa pritet një reagim i mëtejshëm nga autoritetet izraelite dhe ndërkombëtare lidhur me përshkallëzimin e rrezikshëm të konfliktit në Lindjen e Mesme.