Një incident i dhunshëm është shënuar këtë të martë në zyrën elektorale të PSD në zonën e “Ali Demit” në Tiranë, ku një person dyshohet se ka hyrë me forcë dhe është përplasur fizikisht me individë të pranishëm në ambient.
Policia e Tiranës ka shpallur në kërkim shtetasin Arjan Telhallari, i dyshuar si autor i ngjarjes së ndodhur rreth orës 14:00. Sipas informacioneve paraprake, fillimisht është raportuar për të shtëna me armë zjarri, por deri më tani nuk janë gjetur gëzhoja apo prova konkrete që të vërtetojnë përdorimin e armëve. Në vendngjarje janë sekuestruar vetëm dy fishekë luftarak të paplasur.
Telhallari është larguar menjëherë pas incidentit dhe aktualisht është në kërkim nga policia, e cila po vijon hetimet për zbardhjen e plotë të ngjarjes dhe identifikimin e personave të tjerë të përfshirë në konflikt.
Motivet që çuan në hyrjen e dhunshme dhe përshkallëzimin e situatës nuk janë ende të qarta.