Policia e Rrogozhinës ka identifikuar dhe vënë në pranga autorin e dyshuar të zjarrit që përfshiu një sipërfaqe të madhe toke me pemë frutore, në fshatin Ballaj.
Sipas njoftimit zyrtar, pas veprimeve të shpejta hetimore, u arrestua shtetasi I.A., 31 vjeç, banues në Vilëbashtovë. Hetimet treguan se ai kishte ndezur mbeturina në tokën e tij, por flakët i dolën jashtë kontrollit duke u përhapur në një sipërfaqe të gjerë toke.
Materialet procedurale i janë referuar Prokurorisë së Juridiksionit të Përgjithshëm Durrës për veprime të mëtejshme.
Policia e Shtetit u bën apel qytetarëve që të shmangin ndezjen e zjarreve për pastrimin e tokave apo djegien e mbeturinave, pasi rrezikojnë të shkaktojnë dëme të mëdha materiale dhe mjedisore.
Radar.al