“Kur po shkonim te makinat tona, dëgjuam për ngjarjen, nuk pamë asgjë”. Këto mësohet të kenë qenë disa nga fjalët që kanë deklaruar miqtë e Klaudio Prendit në Polici, në dëshminë e tyre për ngjarjen e rëndë që tronditi Tiranën.
Ishin ata, shokë të viktimës, që e dërguan me mjetin e të riut në spital Klaudion, që më pas humbi jetën nga plagët e marra nga arma me silenciator.
Shokët e tij, të cilët janë edhe efektivë policie, kanë deklaruar se ishin me Klaudion para vrasjes, por shprehen se viktima nuk kishte shfaqur shqetësime dhe nuk ka treguar për ndonjë problem.
Ata kanë dëshmuar se qëndruan së bashku për rreth dy orë në një bar kafe në zonën e Xhamllikut në Tiranë, e më pas kanë lëvizur në drejtime të ndryshme.
Gjatë kontrollit të makinës qe u dogj në Farkë, efektivët kanë gjetur edhe armën e llojit pistoletë. Edhe ajo ishte plotësisht e djegur.
Sot 28-vjeçarit Klaudio Prenga i jepet lamtumira e fundit.
Motivet e kësaj vrasjeje momentalisht nuk dihen, megjithatë policia po heton në disa pista. Ndër më të besueshmet duket se janë konfliktet për shkak të borxheve.
Sipas burimeve, viktima dyshohet që ketë pasur një borxh prej 15 mijë eurosh për të kthyer, e për këtë dyshohet ishte konfliktuar fizikisht pak ditë më parë.
27-vjeçari ishte djali i ish-gjyqtarit Fran Prendi. Ky i fundit në dëshminë e tij ka thënë se ishte në dijeni që djali i tij kishte konflikte me të tjerë, por nuk e mendonte se do të përfundonte deri në atentat.
Klaudio Prendi u ekzekutua me armë zjarri në zonën e Porcelanit në Tiranë, rreth orës 01:00 të së martës. Ai u vra në momentin që la lokalin ku po qëndronte me miqtë dhe hipi në automjet. Autorët po e prisnin dhe e qëlluam me armë me silenciator pa zbritur nga makina e tyre. Më pas u larguan dhe e dogjën mjetin në zonën e Farkës.