Sot Sali Berisha ka shpallur bashkëpunimin me Christopher LaCivita një konsulenti politik, i atashuar pranë Presidentit Trump, për të cilin punoi në zgjedhjet e nëntorit 2024.
LaCivita ka një karrierë të gjatë në SHBA dhe është i njohur për dorën e rëndë ndaj klientëve të tij. Në zgjedhjet e fundit presidenciale ai fitoi 22 milionë dollarë për punën që kreu në shërbim të Trump.
Kjo është një shifër e majme, por gjithsesi e përmbajtur kur kemi parasysh se fushatat në SHBA, në veçanti kjo e fundit, janë ndër më të shtrenjtat në botë.
Berisha në fjalën e tij të prezantimit tha se “kryearkitekti i triumfit të Trump do drejtojë fushatën tonë për fitoren në zgjedhjet e 11 majit”.
Fjala e Berishës:
Mirëdita, sot është një ditë e madhe jo vetëm për PD-në dhe opozitën shqiptare, por edhe për Shqipërinë dhe të ardhmen e saj.
Këtu jam para jush me zotin Chris LaCivita, kryetarin e komitetit kombëtar republikan dhe bashkëkryetarin, bashkëarkitektin e fushatës së rikthimit me votën e lirë më të fuqishëm, më të jashtëzakonshëm në të gjithë historinë e njerëzimit,që ishte rikthimi i presidentit Donald Trump në Shtëpinë e Bardhë.
Zoti Chris LaCivita dhe zonja Susanne Ëillis ishin bashkëkryetarë të fushatës më të pabarabartë në historinë e kombit amerikan.
Ata kishin përballë makinerinë propagandistike më gjigante të mashtrimit, manipulimit dhe censurës së mediave kryesore dhe polleve më kryesore të vendit, por pothuajse edhe të planetit, përfshi këtu edhe përpjekjet për përcaktimin e rezultatit të zgjedhjeve në SHBA me metoda terroriste.
Por pavarësisht nga të gjitha këto, ky ekip arritën që presidenti Trump të fitojë mendjen dhe zemrën e shumicës dërrmuese të qytetarëve amerikanë dhe të shënojë njërën nga fitoret më spektakolare në historinë e zgjedhjeve presidenciale në SHBA.
Zoti Chris LaCivita është njeriu që pati fatin e madh t’i drejtohet kombit amerikan nga Mar-A-Lago natën e shpalljes së fitores nga presidenti amerikan në krah të këtij të fundit.
Koalicioni ynë ka zgjedhur, është i nderuar që kryearkitekti, një nga dy kryeartitektët e fushatës së fitores së datës 11 maj të jetë zoti Chris LaCivita.