Një 42-vjeçar shqiptar është arrestuar nga autoritetet shqiptare në qytetin e Shkodrës, pasi ishte i shpallur në kërkim ndërkombëtar nga Prokuroria e Përgjithshme në Perugia të Italisë, për veprën penale të shfrytëzimit të prostitucionit.
Mësohet se ky person ishte dënuar me 5 vite e 6 muaj burg për një rast të ndodhur që në vitin 2014, ku së bashku me dy shtetas italianë dhe një bashkëkombës të tij, kishte organizuar dhe rekrutuar vajza, kryesisht me origjinë rumune dhe disa të mitura, për t’i dërguar në qytetin italian të Perugiës për t’i shfrytëzuar në prostitucion. Viktimat, përveç shfrytëzimit, u përballën edhe me dhunë fizike dhe kërcënime nga grupi kriminal, veçanërisht në rast se nuk siguronin të ardhurat e kërkuara.
Arrestimi i 42-vjeçarit u realizua në Shkodër, pranë kufirit me Malin e Zi, në zbatim të një urdhri ndërkombëtar arresti. Ai ndodhet në pritje të ekstradimit drejt Italisë, ku do të duhet të vuajë dënimin e dhënë nga gjykata italiane.
Ky operacion tregon bashkëpunimin efektiv mes institucioneve shqiptare dhe italiane në luftën kundër krimit të organizuar dhe veprave të rënda penale si shfrytëzimi i njerëzve.