Një 38-vjeçar shqiptar është arrestuar nga policia italiane në momentin që zbriti nga një fluturim i ardhur nga Tirana, në aeroportin e Aeroporto Internazionale dell’Umbria San Francesco d’Assisi.
Arrestimi u krye në kuadër të kontrolleve rutinë kufitare nga autoritetet italiane, të cilat konstatuan se ndaj tij ishte në fuqi një urdhër ekzekutimi i një dënimi të mëparshëm.
Sipas raportimeve, 38-vjeçari rezultonte i dënuar me 10 vite e 5 muaj burgim, në bazë të një vendimi të lëshuar më 17 qershor 2025 nga Prokuroria pranë Gjykatës së Apelit të Firence, për trafikim të lëndëve narkotike.
Nga verifikimet e mëtejshme rezultoi se ai kishte precedentë të shumtë penalë, kryesisht për vepra të lidhura me narkotikët.
Pas përfundimit të procedurave, i arrestuari u dërgua në burgun Carcere di Perugia Capanne, ku iu dorëzua autoriteteve gjyqësore kompetente.