TIRANË– Këngëtari dhe kantautori i mirënjohur shqiptar, Flor Mumajesi, ka zgjedhur që ditëlindjen e tij ta shënojë jo me festime, por me një dedikim prekës për nënën e ndjerë.
Përmes një InstaStory ai ndau me ndjekësit kujtimet më të ndjera nga fëmijëria dhe lidhjen e veçantë që ka pasur me të.
“Dita e lindjes sime nuk është veç e imja. Është dita kur, mes lotësh dhe dhimbjes, erdhi në jetë një djalë mbi katër kilogramë… më 23 gusht një nënë u bë me djalë me mua.”- shkruan Flori.
Artisti ndalet në detaje të thjeshta, por plot ndjenjë, si përqafimet, këngët që nëna i këndonte dhe aroma karakteristike që ai e kujton me mall. Një prej kujtimeve më të përzemërta që ndan është loja e fëmijërisë, kur ajo e mbante në prehër dhe këndonte: “ding dange, e ding dange…”
“Me këtë erë jam rritur. Era që kishim të dy, era jonë, era e nënës. Por tashmë nuk ka sy për ta parë, as zë për të uruar: Gëzuar ditën që më linde, ditëlindjen tonë…”-shkruan ai.
Tashmë prej disa vitesh Flori Mumajesi është tërhequr nga muzika duke lënë përgjysmë karrieren e tij./Radar.al
