Kryeministri Edi Rama, në një takim elektoral me gratë dhe vajzat e Gjirokastrës, foli për drejtësinë dhe për prokurorin e SPAK-ut, Altin Dumani, duke e përshkruar si një figurë me integritet dhe guxim. Por Rama theksoi se Dumani nuk “zbriti nga hëna”, por ishte prej vitesh pjesë e sistemit të drejtësisë në Shqipëri.
“Si ka mundësi që një njeri me kaq kurajo, për vite me radhë, nuk kishte mundësinë të thërriste asnjë me pushtet në zyrë?”, tha Rama, duke shtuar se ajo që ka ndryshuar nuk është individi, por vetë sistemi falë reformës në drejtësi të ndërmarrë nga Partia Socialiste.
Kreu i qeverisë theksoi se në Shqipëri, për herë të parë në histori, një figurë e lartë politike jep llogari para drejtësisë, diçka që më parë ishte e paimagjinueshme.
Ai solli në vëmendje ngjarjen e 21 janarit dhe mënyrën si reaguan drejtuesit e atëhershëm të shtetit, duke e krahasuar me realitetin e sotëm ku, sipas tij, institucionet e drejtësisë janë të pavarura.
“Ne në PS morëm një vendim që nuk e kishte marrë askush më parë: hoqëm dorë nga kontrolli mbi drejtësinë dhe ia dorëzuam sistemit”, u shpreh Rama.