Autoritetet e Hong Kongut po i drejtohen teknologjisë për të frenuar kërcënimin e virusit Chikungunya, i cili përhapet nga mushkonjat e tipit Aedes. Pas regjistrimit të nëntë rasteve të importuara këtë vit, qeveria ka njoftuar se duke filluar nga muaji i ardhshëm do të vendosë në terren qen robotë të pajisur me spërkatës insekticidesh.
Sekretari për Mjedisin dhe Ekologjinë, Tse Chin-wan, tha se këta robotë do të lehtësojnë ngarkesën e punonjësve të vijës së parë, sidomos në ditët e nxehta, duke depërtuar në terrene të vështira ku zakonisht gjenden vatrat e shumimit të mushkonjave.
Qentë robotikë, të ngjashëm me ata të zhvilluar nga Boston Dynamics, janë të pajisur me kamera, sensorë dhe inteligjencë artificiale që u mundësojnë të zbulojnë vendet e shumimit dhe të dërgojnë të dhëna në kohë reale tek ekipet shëndetësore.
Ndërkohë, virusi Chikungunya është në rritje në provincën Guangdong të Kinës, ku vetëm në qytetin Foshan janë raportuar mbi 7,000 raste që nga qershori. Aktualisht, në Hong Kong nuk ka trajtim të disponueshëm për këtë sëmundje.
Përveç robotëve, qeveria po shqyrton edhe metoda të tjera për kontrollin e mushkonjave, përfshirë një teknikë të rekomanduar nga OBSH, e cila konsiston në futjen e baktereve tek mushkonjat Aedes albopictus për të reduktuar aftësinë e tyre për t’u riprodhuar dhe përhapur virusin.