Gjatë vitit 2025, 125 persona janë diagnostikuar me HIV/AIDS në Shqipëri, tre më shumë se një vit më parë, sipas të dhënave të përllogaritura deri në muajin tetor. Nga rastet e raportuara, 98 janë meshkuj dhe 27 femra.
Fatkeqësisht, 15 persona kanë humbur jetën si pasojë e HIV, ndërsa Instituti i Shëndetit Publik ka regjistruar edhe një rast të transmetimit të virusit nga nëna te fëmija, një fenomen që aktivistët e shëndetit publik e konsiderojnë të patolerueshëm.
Që nga viti 1993, kur u diagnostikua rasti i parë me HIV në Shqipëri, janë regjistruar gjithsej 1,973 persona të prekur nga kjo sëmundje. Sipas të dhënave, rruga kryesore e përhapjes mbetet ajo seksualisht:
Transmetimi seksual: 72.6%
Meshkujt që kryejnë seks me meshkuj: 23.4%
Nga nëna te fëmija: 2.4%
Nëpërmjet gjakut: 0.6%
Përdorimi i drogave me injektim: 0.6%
Shoqatat e personave me HIV dhe ekspertët shëndetësorë ngrenë shqetësimin për rritjen e sëmundjeve seksualisht të transmetueshme, që mund të pasohet me një rritje të infektimeve me HIV/AIDS. Ata kërkojnë më shumë vëmendje dhe veprime nga Instituti i Shëndetit Publik dhe strukturat shtetërore për parandalimin dhe trajtimin e hershëm të rasteve.