Prokuroria e Fierit ka nisur hetimet dhe ka kërkuar nga gjykata vlerësimin e masës së arrestit për tre personat e ndaluar në Fier, të afërm të ish-kryebashkiakut të Mallakastrës Agron Kapllanaj pas incidentit me hetuesit e BKH.
Prokuroria pranë Gjykatës së Shkallës së Parë të Juridiksionit të Përgjithshëm në Fier ka regjistruar procedimin penal nr. 509, datë 16 prill 2025, për veprën penale “Goditje për shkak të detyrës”, kryer në bashkëpunim, në bazë të neneve 237/3 dhe 25 të Kodit Penal.
Procedimi u regjistrua pas një incidenti të ndodhur në zonën e “Rrethrrotullimit të Parkut”, Fier, ku disa persona ushtruan dhunë fizike ndaj hetuesve të Byrosë Kombëtare të Hetimit (BKH) dhe oficerëve të Forcës së Posaçme Operacionale, të cilët po zhvillonin veprime hetimore në kuadër të një çështjeje të Prokurorisë së Posaçme SPAK, në aksin Fier–Patos, pranë fshatit Portëz e Madhe.
Sipas hetimeve paraprake, fillimisht hetuesit u filmuan nga një shtetas i identifikuar si O.I., çka i detyroi të zhvendosen. Më pas, rreth 30 minuta më vonë, ata u sulmuan fizikisht nga disa persona të ardhur me tre automjete, pavarësisht se punonjësit ishin prezantuar si zyrtarë të shtetit.
Prokuroria ka kërkuar në gjykatë vleftësimin e ligjshëm të arrestimit në flagrancë dhe caktimin e masës së sigurisë për shtetasit K.K., L.K. dhe G.K., të cilët dyshohet se janë të afërm të Agron Kapllanajt.
Institucioni i akuzës thekson vendosmërinë për të hetuar dhe ndëshkuar çdo akt dhune ndaj punonjësve të policisë dhe zyrtarëve të tjerë shtetërorë, duke mbrojtur ligjshmërinë dhe rendin publik.