Në fillim të vjeshtës pritet të hapet spitali i ri në Qendrën Spitalore Universitare “Nënë Tereza”, ku do të funksionojnë shërbimet e Kardiokirurgjisë dhe Kirurgjisë Vaskulare me pesë salla moderne ndërhyrjesh.
Risia kryesore është salla hibride e operacioneve, e vetmja në Shqipëri, që lejon kombinimin e ndërhyrjeve klasike me bisturi dhe procedurave me kateter.
Spitali i ri do të rrisë ndjeshëm numrin e operacioneve kardiake dhe do të ofrojë kushte bashkëkohore për pacientët. Një hapësirë e veçantë është menduar për fëmijët që lindin me probleme në zemër, të cilët deri më tani nuk mund të kryenin të gjitha procedurat në vend.
Në reanimacion janë shtuar kapacitetet me 13 shtretër, me ndarje për fëmijët, të rriturit dhe pacientët me infeksione, duke ofruar siguri dhe trajtim të diferencuar.