Ish-punonjësi i IT pranë Inspektoriatit të Mbrojtjes së Territorit (IMT), Arnold Rrokaj, i cili para pak ditësh ndërhyri në email-et e disa prej prokurorëve të Prokurorisë së Posaçme (SPAK), ka dëshmuar në lidhje me këtë veprim.
Në dëshminë e tij, Rrokaj mësohet së ka pohuar se arriti të thyente e-mailet e tre prokurorëve duke kopjuar kështu komunikimet hetimore për 3 çështje. Ndërsa ka shtuar se e ka ndërmarrë këtë veprim vetëm nga kurioziteti.
Gazetarja Anila Hoxha raporton se për grupin e hetimit është qartësuar se i dyshuari, me detyrë të mëparshme punonjës pranë IMT, ia ka kaluar të dhënat Zambak Gjonit, me profesion jurist, i njohur dhe si ish-zyrtar i burgjeve.
Pavarësisht kësaj hetuesit janë të bindur se i riu nuk ka thënë të vërtetën.
Kujtojmë se sulmi, siç njoftoi zyrtarisht SPAK, u sinjalizua në datën 12 mars 2025, por në harkun e 48 orëve janë identifikuar dy bashkëpunëtorët, ndaj të cilëve u vendos arrest në burg.
Gjykata e Posaçme, me kërkesë të SPAK, njëherazi urdhëroi ‘ndalimin e publikimit të dosjes’, duke qenë se hetimet po vazhdojnë ende për të zbardhur të gjithë skenarin.