Deri më tani, mësohet se SPAK ka marrë në pyetje si deklarues 72 shtetas për rrjedhjen e të dhënave të hakeruara nga tre email-e prokurorësh.
Kujtojmë se i dyshuari Arnold Rrokaj ia shpërndau të dhënat të arrestuarit tjetër, Zambak Gjoni, ish-zyrtar i burgjeve në Shqipëri.
Dyshja në fjalë janë lënë pas hekurave, ndësa mësohet se Apeli pritet të shqyrtojë më 22 prill kërkesën e tyre, në një proces me dyer të mbyllura.
Në seancën pasardhëse mësohet se do të shqyrtohet urdhri i SPAK për mospublikim të të dhënave.
Të dy shtetasit kërkojnë lirinë sepse sipas tyre veprimi që kanë kryer nuk është i rrezikshëm dhe, po ashtu, ata nuk kanë rrezikshmëri. Mirëpo diçka e tillë hidhet poshtë nga SPAK.
Burime për Top Channel bëjnë me dije se cilat janë informacionet e tërhequra nga email-et e tre prokurorëve, që dyshohet se nuk e kishin rinovuar passëord-in e email-eve, ndërkohë që kjo kleçkë është shfrytëzuar nga Rrokaj, një specialist pranë IMT, që besohet se mes të tjerash ka tërhequr edhe një dosje për evazion fiskal ndaj shtetasit Klodjan Allajbeu dhe dy të tjera ndaj dy ish-funksionarëve, nën hetim për korrupsion dhe shpërdorim detyre.
Në momentin që arriti të përftonte këto të dhëna, Rrokaj ia ka përcjellë Gjonit duke i thënë “shiko çfarë gjeta”. Ndërsa në momentin e marrjes në pyetje nga grupi i hetimit, Rrokaj ka këmbëngulur se hakeroi email-et nga kurioziteti.
Nga ana tjetër Zambak Gjoni insistoi se nuk e dinte rëndësinë e materialeve hetimore, një version që është hedhur poshtë nga SPAK, për sa kohë Gjoni është jurist dhe mban licencën e avokatit.
Nuk dihet ende nëse ata do të flasin më tej.
SPAK po heton edhe për grup kriminal, për të zbuluar kush gjendet pas dy të arrestuarve.