Pas një qershori rekord të nxehtë, Greqia po përgatitet të përballet me një tjetër valë përvëluese të të nxehtit, me temperaturat që pritet të arrijnë deri në 43 gradë Celsius nën hije në disa zona.
Meteorologët grekë paralajmërojnë se vala e re do të arrijë kulmin mes datave 7 dhe 10 korrik, me ndikim të veçantë në qendrat urbane dhe zonat kontinentale, ku temperaturat do të mbeten të larta edhe gjatë natës, duke rritur rrezikun për shëndetin publik.
“Kushtet meteorologjike do të bëhen veçanërisht të rrezikshme”, theksojnë ekspertët, duke paralajmëruar për ndikim të fortë në qytetet e mëdha dhe zonat turistike.
Autoritetet greke kanë ndërmarrë masa emergjente:
• Hapje të qendrave të ftohjes me ajër të kondicionuar në bashki
• Ndërprerje të përkohshme të punës në ambientet e hapura nga ora 12:00 deri në 17:00
• Kujdes i shtuar në zona të frekuentuara si Akropoli
• Linja telefonike për ndihmë dhe këshilla mjekësore për qytetarët
Mjekët këshillojnë qytetarët të qëndrojnë të hidratuar, të shmangin daljet gjatë mesditës, të kufizojnë përdorimin e alkoolit dhe të mos hedhin mbeturina që mund të nxisin zjarr.
Kjo valë e të nxehtit vjen në një moment kur Greqia është përfshirë edhe nga disa zjarre të mëdha, përfshirë ishullin Kios, periferinë e Athinës dhe rrethinat e Selanikut. Qindra zjarrfikës janë angazhuar për të vënë nën kontroll flakët, teksa vendi përballet me një verë gjithnjë e më të thatë dhe ekstreme, të nxitur nga ndryshimet klimatike.