Një ngjarje e pazakontë po zhvillohet në Tiranë, ku një e moshuar 82-vjeçare, Irini, është gjobitur nga Agjencia e Mbrojtjes së Konsumatorit me 10 mijë lekë, me pretendimin se ka shkaktuar ndotje akustike për shkak të maceve që ushqen pranë banesës së saj.
Irini, e cila njihet nga banorët si një dashamirëse e kafshëve, jeton me disa mace dhe ushqen çdo ditë edhe ato të rrugës. Por ky përkushtim ndaj kafshëve të braktisura nuk është mirëpritur nga autoritetet bashkiake, të cilat në fletën e gjobës e kanë urdhëruar të “largojë menjëherë macet.”
Ngjarja ka marrë përmasa ligjore, pasi Irini ka refuzuar të paguajë gjobën dhe ka paditur vendimin në Gjykatën Administrative të Tiranës, me ndihmën e avokates së saj. Në kërkesën paraprake për sigurimin e padisë, ajo kërkon pezullimin e gjobës derisa çështja të shqyrtohet në themel.
“Nuk ekziston asnjë ligj që më ndalon të jetoj me macet apo t’u jap për të ngrënë. Janë krijesa të gjalla që kanë nevojë për dashuri dhe kujdes,” – ka deklaruar Irini në sallën e gjyqit.
Rasti ka ngjallur reagime dhe mbështetje në rrjetet sociale, ku shumë qytetarë e kanë quajtur veprimin e bashkisë “të padrejtë dhe çnjerëzor”. Shumë prej tyre kanë shpërndarë mesazhe mbështetëse për të moshuarën, e cila shihen si simbol i dashurisë për kafshët në një qytet ku shpesh ato harrohen dhe shpërfillen.
Tashmë, të gjithë sytë janë nga Gjykata Administrative, e cila pritet të vendosë nëse përkushtimi i një 82-vjeçareje ndaj maceve të rrugës është kundërvajtje – apo një akt i thjeshtë njerëzor që duhet mbështetur.