Gjykata Kushtetuese ka vendosur të pranojë pjesërisht kërkesën e paraqitur nga 38 deputetë të Kuvendit të Shqipërisë, duke detyruar Kuvendin të ngrejë komisionin hetimor për verifikimin e përdorimit të burimeve shtetërore gjatë zgjedhjeve të 11 majit 2025. Ndërkohë, ajo ka rrëzuar kërkesën për ngritjen e komisionit hetimor lidhur me verifikimin e veprimeve të zyrtarëve shqiptarë në raport me ish-agjentin e FBI-së, Charles McGonigal.
Vendimi u mor pas shqyrtimit të mosmarrëveshjes së kompetencës mes një të katërtës së deputetëve dhe Kuvendit, lidhur me refuzimin e ngritjes së dy komisioneve hetimore të kërkuara nga opozita.
Sa i takon çështjes McGonigal, Gjykata vlerësoi me shumicë votash se kërkesa nuk plotësonte kriteret kushtetuese të nevojshme për ngritjen e një komisioni hetimor. Sipas arsyetimit të saj, nuk u arrit shumica e nevojshme për të vlerësuar ekzistencën e një “çështjeje të veçantë” dhe të indicieve të qarta që do të justifikonin ngritjen e komisionit.
Ndryshe vendosi Gjykata për komisionin hetimor që lidhet me kontrollin e ligjshmërisë së veprimtarisë së institucioneve qendrore dhe vendore, si dhe me verifikimin e përdorimit të administratës shtetërore për qëllime elektorale në zgjedhjet parlamentare të vitit 2025. Sipas Gjykatës, kjo kërkesë përmbush kriteret kushtetuese dhe jurisprudencën përkatëse për ngritjen e një komisioni hetimor parlamentar.
Për pasojë, Gjykata Kushtetuese shfuqizoi vendimin e Kuvendit që kishte refuzuar ngritjen e këtij komisioni dhe përcaktoi detyrimin e Kuvendit për ta ngritur atë.
Vendimi është përfundimtar dhe hyn në fuqi pas botimit në Fletoren Zyrtare, ndërsa arsyetimi i plotë do të publikohet brenda afateve të parashikuara ligjore.