Gjykata e Lartë e SHBA ka bllokuar përkohësisht deportimin e disa venezuelasve të ndaluar në Teksas, të dyshuar si anëtarë të bandës kriminale Tren de Aragua. Vendimi erdhi pas një kërkese urgjente nga ACLU, që argumentoi se individët përballeshin me dëbim pa një shqyrtim të drejtë ligjor.
Administrata Trump kishte nisur procedurat e dëbimit duke u bazuar në Aktin e Armiqve të Huaj të vitit 1798, një ligj historik i kohës së luftës. Deri tani, 137 persona janë dëbuar përmes këtij ligji, nga gjithsej 261 venezuelas të riatdhesuar në El Salvador që nga 8 prilli.
Shtëpia e Bardhë e ka cilësuar sfidën gjyqësore si “të pamerituar” dhe shprehet e bindur se vendimi përfundimtar do t’u japë të drejtë autoriteteve.