Gjykata e Posaçme kundër Korrupsionit dhe Krimit të Organizuar (GJKKO) ka rrëzuar kërkesën e Arben Meskutit, të njohur si “bosi i mikrokredive”, për ndryshim të masës së sigurisë dhe heqje të sekuestrot mbi pasuritë.
Vendimi u dha nga gjyqtari Erjon Bani, i cili e cilësoi kërkesën të pabazuar në prova dhe në ligj.
Meskuti, një nga nëntë personat e përfshirë në dosjen hetimore për zhvatjen e qindra qytetarëve përmes skemave të mikrokreditimit, kishte kërkuar zëvendësimin e masës “arrest në burg” me masa më të lehta sigurie apo garanci pasurore, duke argumentuar se afati i paraburgimit kishte kaluar fuqinë.
Një tjetër kërkesë e tij ishte heqja e sekuestrit mbi llogaritë bankare personale, duke pretenduar se bllokimi i tyre po dëmtonte përmbushjen e detyrimeve familjare dhe të drejtave të fëmijëve të mitur.
Pas shqyrtimit të pretendimeve, GJKKO vendosi të lërë në fuqi masën e arrestit në burg dhe sekuestron mbi pasuritë, duke refuzuar të gjitha kërkesat e Meskutit.
Dosja ndaj tij dhe bashkëpunëtorëve është kaluar për kompetencë pranë SPAK, për shkak të natyrës së dyshuar kriminale dhe përmasave të çështjes.