Qeveria gjermane po shton presionin ndaj kompanive industriale që të angazhohen më shumë në prodhimin e mbrojtjes, duke synuar rritjen e kapaciteteve dhe forcimin e zinxhirit të furnizimit në një periudhë sfidash të rritura në sigurinë globale.
“Deri më tani, industria e mbrojtjes dhe sektorët e tjerë të rëndësishëm kanë funksionuar paralelisht. Kjo duhet të ndryshojë”, deklaroi ministri i Mbrojtjes, Boris Pistorius, gjatë një takimi në Berlin me përfaqësues të industrisë, shoqatave dhe ministren e Ekonomisë Katherina Reiche.
Në takim u prezantua platforma e re “SVI-Connect”, e krijuar për të lidhur më shpejt dhe më efikasisht sektorin e mbrojtjes me furnizues të rinj nga industria civile, duke plotësuar boshllëqet në zinxhirët aktualë të furnizimit.
“Politika e sigurisë sot është edhe politikë ekonomike”, u shpreh Reiche, ndërsa Pistorius theksoi se rritja e kapaciteteve të prodhimit është domosdoshmëri strategjike:
“Përfshirja e furnizuesve të rinj e bën të gjithë zinxhirin më të qëndrueshëm dhe më të sigurt.”
Presidenti i Federatës së Industrisë Gjermane (BDI), Peter Leibinger, kërkoi thjeshtimin drastik të procedurave të prokurimit, duke theksuar se industria civile duhet të zhvillojë aftësi të reja për të mbështetur forcat e armatosura.
“Duhet të mësojmë më shumë për të shërbyer ushtrinë”, theksoi ai.