Presidenti i Shteteve të Bashkuara, Donald Trump, ka shprehur pakënaqësinë e tij ndaj homologut rus, Vladimir Putin, pas sulmit më të rëndë rus në Kiev në muajt e fundit.
Duke folur nga Zyra Ovale të enjten, Trump theksoi se bombardimet ndodhën në një moment kur po zhvillohen bisedime për paqe. “Nuk më pëlqeu nata e kaluar, nuk isha i kënaqur me të. Jemi në mes të bisedimeve për paqe dhe raketat u lëshuan”, tha ai, duke komentuar postimin e mëparshëm në Truth Social ku shkruante: “Vladimir, STOP!”.
I pyetur nga gazetarët nëse po shqyrton vendosjen e sanksioneve të reja ndaj Rusisë, presidenti nuk dha një përgjigje të prerë. “Do të preferoja të përgjigjesha për këtë brenda një jave. Dua të shoh nëse mund të arrihet një marrëveshje. Nuk ka arsye për t’iu përgjigjur tani, por nuk do të jem i lumtur nëse kjo vazhdon. Gjërat… do të ndodhin,” u shpreh ai në mënyrë enigmatike.
Sa i përket mundësisë që Ukraina të lëshojë territor për të arritur armëpushim me Rusinë, Trump zgjodhi të mbetej i paqartë: “Varet nga cili territor,” tha ai. Presidenti kujtoi gjithashtu aneksimin e Krimesë nga Rusia gjatë presidencës së Barack Obamës, duke nënvizuar: “Ata thonë, ‘A mund ta kthesh?’ – Mendoj se do të jetë shumë e vështirë për t’u bërë.”