Familjarët e 15-vjeçarit Erion Boba, i cili ndërroi jetë dje pas gjashtë ditësh në Spitalin Universitar “Nënë Tereza” në Tiranë, kanë denoncuar trajtimin fillestar që ai mori në Spitalin Rajonal të Durrësit. Ata deklaruan se gjatë operacionit kishin ikur dritat, duke theksuar mungesën e kushteve bazë për një ndërhyrje emergjente.
“Halla e të ndjerit” u shpreh se gjatë qëndrimit të tyre në spital, mjekët janë munduar të ndihmojnë, por kushtet kanë qenë fatale, pa ashensor për emergjenca dhe me ndërprerje energjie gjatë operacionit, duke e cilësuar situatën “si në mesjetë”.
Pas akuzave, Spitali Rajonal Durrës reagoi zyrtarisht, duke shprehur ngushëllimet për familjen dhe sqaruar se pacienti ishte paraqitur në gjendje jashtëzakonisht kritike, me shok traumatik-hemorragjik. Ekipet mjekësore ndërhynë menjëherë dhe stabilizuan pacientin për trajtim intensiv. Sipas spitalit, komplikacionet që çuan në vdekjen e të miturit ishin pasojë e gjendjes së tij kritike dhe arrestit kardiak traumatik.
Në lidhje me pretendimin për ndërprerje energjie gjatë operacionit, spitali sqaroi se nuk është konstatuar asnjë ndërprerje e tillë. Sistemi i gjeneratorëve funksionon automatikisht dhe pajisjet jetike kanë bateri rezervë, që sigurojnë vazhdimësi. Ashensorët janë gjithashtu funksionalë dhe të mbuluar me kontrata mirëmbajtjeje.
Spitali thekson se është i angazhuar për garantimin e kujdesit shëndetësor dhe bashkëpunon plotësisht me institucionet kompetente për sqarimin e ngjarjes.
Spitali Rajonal Durrës
Duke shprehur ngushëllimet më të sinqerta për familjen e të miturit E.B, i cili humbi jetën informojmë opinionin publik se pacienti është paraqitur në gjendje jashtëzakonisht të rëndë, në shok traumatik–hemorragjik.
Ekipet mjekësore kanë ndërhyrë menjëherë me procedura emergjente të specializuara, duke arritur stabilizimin fillestar dhe trajtimin intensiv pasues. Komplikacionet e zhvilluara janë pasojë e gjendjes kritike dhe arrestit kardiak traumatik.
Në vijim të publikimeve mediatike mbi pretendimin se gjatë ndërhyrjes kirurgjikale në Spitalin Rajonal Durrës “kanë ikur dritat”, sqarojmë opinionin publik si më poshtë:
Pas verifikimeve të kryera me ekipet e sallës së operacionit, anestezistët dhe stafin e reanimacionit, nuk është konstatuar asnjë ndërprerje energjie gjatë operacionit të pacientit në fjalë.
Sistemi i gjeneratorit aktivizohet automatikisht dhe pajisjet jetike kanë bateri të brendshme rezervë, që sigurojnë vazhdimësi të plotë edhe në rast të luhatjeve të mundshme.
Gjithashtu, ashensorët e spitalit janë funksionalë dhe të mbuluar me kontratë aktive mirëmbajtjeje, me mekanizma ndërhyrjeje të menjëhershme në rast defektesh.
Spitali Rajonal Durrës është i angazhuar për garantimin e kujdesit shëndetësor dhe bashkëpunon plotësisht me institucionet kompetente për sqarimin e ngjarjes.