Një përplasje brutale për kontrollin e trafikut të drogës në Frosinone, Itali, çoi në vrasjen e Kasen Kasmit dhe plagosjen e rëndë të tre shqiptarëve të tjerë. Ngjarja ndodhi më 9 mars 2023 në “Shake Bar” në rrugën qendrore “Via Aldo Moro”, dhe sot drejtësia italiane dha vendimin: 20 vite burg për autorin e masakrës, Mikea Zaka.
Sipas arsyetimit të gjykatësit Antonello Bracaglia Morante, ngjarja nuk ka qenë një reagim në vetëmbrojtje, por një atentat i paramenduar në kuadër të një lufte të egër për territoret e drogës. Viktimat, sipas hetimeve, ishin dërguar në lokal për ta sulmuar Zakën, i cili i kishte pritur me armë në dorë.
Gjykata shpjegon se dënimi maksimal prej 30 vitesh u ul në 20 për shkak të procedurës së shkurtuar të gjykimit. Në vendimin 72-faqësh, theksohet se në burg, i pandehuri është kapur duke komunikuar me Shqipërinë, duke kërkuar mbrojtje për familjen, çka përforcon dyshimet për lidhje të thella me rrjete mafioze shqiptare.
Autoritetet italiane janë në alarm për shkallën e përfshirjes së grupeve kriminale shqiptare në territor, veçanërisht në Frosinone dhe zonat përreth, ku duket se luftërat për kontrollin e drogës po përshkallëzohen në dhunë të organizuar.