Për herë të parë, Shqipëria do të jetë mikpritëse e “Grande Partenza”, nisjes së madhe të një prej garave më prestigjioze të çiklizmit botëror, Giro d’Italia. Ky zhvillim historik pritet të vendosë vendin në vëmendjen e mediave ndërkombëtare dhe të dashamirësve të sportit anembanë globit.
Nga sheshi “Skënderbej” në Tiranë, ku po bëhen përgatitjet për prezantimin e skuadrave pjesëmarrëse, Kryeministri Edi Rama u shpreh në një videomesazh mbi rëndësinë e këtij eventi.
“Në sheshin ‘Skënderbej’, ku nga njëra anë po përgatitemi për të mikpritur gjithë Europën më 16 maj, dhe nga ana tjetër po bëhemi gati për nisjen e madhe të ‘Giro d’Italia’ pas 48 orësh”, tha Rama.
Kreu i qeverisë e cilësoi këtë një moment të veçantë për vendin, pasi, sipas tij, “200 televizione në mbarë botën do të shfaqin Shqipërinë, Europën e Ballkanit”.
“Jam shumë i lumtur që për tre ditë me radhë, Shqipëria do të shfaqë gjithë bukurinë dhe mikpritjen e saj para syve të botës, dhe që qytetarët shqiptarë, sidomos fëmijët, do të kenë mundësi të përjetojnë nga afër një garë legjendare si Giro d’Italia”, përfundoi Rama.