Gazeta e njohur greke Protothema i ka kushtuar një artikull të zgjeruar historisë së sipërmarrësit shqiptar Samir Mane, i cili është tashmë miliarderi i parë i Shqipërisë, por edhe i gjithë Ballkanit Perëndimor, sipas renditjes së fundit të Forbes.
Sipas Protothema, historia e Manes përfaqëson transformimin e thellë që ka kaluar Shqipëria në këto tri dekada pas rënies së komunizmit. Nga një vend i izoluar që prodhoi dikur stereotipe të trishta mbi “turistin shqiptar”, sot vjen në vëmendje figura e një sipërmarrësi që ka ndërtuar një perandori ekonomike me ndikim rajonal dhe ndërkombëtar.
Nga kamioni i parë në rrugën Vjenë–Tiranë, tek perandoria shumëkombëshe
Protothema sjell detaje të rrugëtimit të Manes, i cili nisi gjithçka në fillim të viteve 1990, kur u largua nga Shqipëria me një vizë të falsifikuar drejt Vjenës. Aty ai filloi aktivitetin e tij duke blerë pajisje elektronike që i transportonte vetë me kamion për t’i shitur në Shqipëri, në një kohë kur infrastruktura e vendit ishte primitive dhe mundësitë e importit thuajse të pamundura.
Kjo ishte baza nga ku lindi më pas Balfin Group, që sot është shndërruar në një nga grupet më të mëdha të investimeve në Ballkanin Perëndimor, me aktivitet në 11 shtete dhe në 8 sektorë ekonomikë. Sot grupi përfshin bankë, pasuri të paluajtshme, logjistikë, turizëm, elektronikë, energji dhe argëtim.
Dominim rajonal, ekspansion global
Protothema thekson se Mane sot është një figurë dominuese në Shqipëri dhe rajon, ndërsa grupi i tij ka hyrë fuqishëm edhe në tregjet perëndimore si SHBA dhe Kanada. Balfin zotëron rrjetin më të madh të shitjes me pakicë të elektronikës në rajon, si edhe projekte madhore turistike si Green Coast, Vala Mar dhe Vlora Marina, që tërheqin marka ndërkombëtare si Accor, Grand Melia dhe Hyatt.
Gazeta greke veçon edhe bashkëpunimin e ngushtë të Manes me rrjetin grek Jumbo, i cili nisi në 2011 dhe sot numëron 26 dyqane në Ballkan. Ndërkohë, sipas planit të ri të zgjerimit, dy kompanitë po hyjnë së bashku edhe në Moldavi.
“Nuk jam oligark”
Në shkrimin e saj, Protothema i kushton vëmendje edhe pozicionimit personal të Manes në lidhje me akuzat që janë ngritur në Shqipëri për lidhje të mundshme me politikën apo aferat korruptive. Mane ka mohuar çdo përfshirje:
“Nuk kam marrë pjesë kurrë në privatizime, nuk kam qenë pjesë e politikës. Unë nuk jam oligark. Pasurinë time e ndërtova në Austri dhe u ktheva në vendin tim.”
Nga inspirimi te filozofia e biznesit
Protothema nënvizon se filozofia e Manes është frymëzuar nga menaxherët e njohur amerikanë Jack Welch dhe Sam Walton: diversifikim i aktivitetit dhe fokus te zgjerimi i shitjes me pakicë jashtë kufijve të Shqipërisë, duke parë kufizimet e tregut vendas.
“Shqipëria është e vogël. Pse të mos zgjerohemi në rajon dhe më tej?” – citohet Mane nga Protothema./skyweb.al
“E nesërmja, magneti im”/ Mëkatet e Berishës: Të shumta, lëri mos i numëro
Gazeta e njohur greke: Si arriti në majë miliarderi i parë shqiptar, rrugëtimi i Samir Manes