Në Paris duket se po afrohet fundi i aventurës së Gianluigi Donnarummës me kampionët e Francës. Portieri italian, i cili u bashkua me PSG-në në vitin 2021, është pranë një ndarjeje të papritur nga “Parc des Princes”.
Sipas burimeve pranë klubit, gjatë kësaj jave do të zhvillohet një takim vendimtar mes drejtuesve dhe përfaqësuesve të 26-vjeçarit, ku do të diskutohet ndërprerja e bashkëpunimit dhe opsionet për shitjen e tij në merkaton aktuale. PSG, e cila nuk dëshiron të rrezikojë humbjen e tij me parametër zero në verën e vitit 2026 kur i skadon kontrata, duket e vendosur ta nxjerrë në shitje tani për të përfituar financiarisht.
Situata ka tërhequr menjëherë interesin e disa klubeve të mëdha. Në krye të listës qëndron Chelsea, që pas një sezoni të paqëndrueshëm në portë po kërkon një gardian të nivelit më të lartë për të forcuar mbrojtjen. Po ashtu, Galatasaray, kampionët e Turqisë, janë gati të bëjnë një ofertë konkrete për të siguruar shërbimet e italianit dhe për ta kthyer në liderin e ri të skuadrës.
Lëvizjet e kësaj jave pritet të jenë vendimtare për të ardhmen e Donnarummës, i cili gjithnjë e më shumë shihet jashtë projektit të PSG-së. A do të jetë kjo vera e madhe e transferimit të tij? Pritet që përgjigjja të vijë shumë shpejt.