Kombëtarja shqiptare do të luajë më 13 nëntor në transfertë ndaj Andorrës, në sfidën e radhës të kualifikueseve të Botërorit 2026, ku kuqezinjtë mund të sigurojnë matematikisht vendin në playoff.
FSHF njofton se shitja e biletave ka nisur që sot dhe realizohet vetëm online, përmes linkut të publikuar në faqen zyrtare të Federatës. Tifozët që kryejnë blerjen do të marrin biletat në adresën e emailit të tyre një ditë para ndeshjes, më 12 nëntor.
Federata kujton se hyrja në stadium kërkon mjet identifikimi, ndërsa objektet e ndaluara nuk do të lejohen brenda impiantit.
Pas sfidës me Andorrën, Shqipëria do të mbyllë grupin K më 16 nëntor në “Air Albania”, ku do të përballet me Anglinë. Të dyja ndeshjet transmetohen drejtpërdrejt në platformën Digitalb.
Aktualisht, kuqezinjtë renditen në vendin e dytë me 11 pikë, një më shumë se Serbia.