Strukturat e DVP Shkodër, në bashkëpunim me Komisariatin e Policisë Malësi e Madhe dhe me mbështetjen e Forcës së Posaçme “Shqiponja”, finalizuan operacionin policor të koduar “Wanted”, duke kapur shtetasin e shpallur në kërkim B. B., 33 vjeç, banues në fshatin Premal.
Gjykata e Shkallës së Parë Shkodër caktoi për të masën e sigurisë “Arrest në burg”, me qëllim ekstradimin në Mbretërinë e Bashkuar. Autoritetet britanike kishin lëshuar ndaj tij urdhër-arrest për veprën penale “Shkelja e ligjit për lëndët narkotike”, e kryer në bashkëpunim.
Materialet procedurale u referuan Prokurorisë pranë Gjykatës së Shkallës së Parë Shkodër për veprime të mëtejshme. Operacioni vjen si rezultat i punës së vazhdueshme të policisë për lokalizimin dhe kapjen e personave të shpallur në kërkim.