Igli Tare ka nisur zyrtarisht detyrën si drejtori sportiv i Milanit, dhe që në ditën e parë të punës ka hedhur hapa konkretë drejt përforcimeve. Të hënën pasdite ai është parë në selinë e klubit “Casa Milan”, ku zhvilloi një takim me drejtuesit e Romës për të diskutuar të ardhmen e tre futbollistëve.
Në qendër të bisedimeve ishin Alexis Saelemaekers dhe Tammy Abraham, të cilët sezonin e fundit ishin në huazim respektivisht te Roma dhe Milani. Të dyja marrëveshjet ishin pa klauzolë blerjeje, ndaj tani palët po negociojnë kushtet e reja për të ardhmen e tyre. Roma është e interesuar të mbajë belgun Saelemaekers, ndërsa Milani nuk është ende i bindur për ta mbajtur sulmuesin anglez Abraham.
Një tjetër temë diskutimi ishte sulmuesi i talentuar i të rinjve, Francesco Camarda. 17-vjeçari kërkon më shumë minuta loje sezonin e ardhshëm, dhe një huazim te Roma është një opsion real, sidomos pas rënies nga kategoria e Milan Futuro në Serie C.
Takimi u zhvillua në praninë e agjentit Beppe Riso, i cili ka ndërmjetësuar edhe më parë marrëveshje mes këtyre dy klubeve. Kjo lëvizje konfirmon se Tare është gati të sjellë eksperiencën e tij te Milani, duke nisur menjëherë me lëvizje konkrete në merkato.