Drejtoria e Përgjithshme e Tatimeve ka bërë të ditur se fermerët që shesin produkte bujqësore të papërpunuara mund të përfitojnë një kompensim prej 10% për çdo furnizim të dokumentuar me faturë tatimore, përmes sistemit të autofaturës.
Sipas Drejtorisë, për të përfituar nga skema, fermerët duhet të jenë të regjistruar me NIPT, të kryejnë shitje tek subjekte të regjistruara për TVSH dhe të fiskalizojnë faturat përkatëse.
Aplikimi bëhet çdo gjashtë muaj, ndërsa kompensimi u paguhet fermerëve brenda 30 ditëve nga aplikimi. Autoritetet tatimore njoftojnë se është e rëndësishme që çdo furnizim të regjistrohet saktë për të përfituar mbështetjen që u takon.
Kjo masë synon të mbështesë fermerët dhe të formalizojë tregtinë e produkteve bujqësore, duke garantuar transparencë dhe përfitim të drejtë për çdo prodhues.