Pas vrasjes së 64-vjeçarit Gjovalin Prendi më 17 prill pranë lokalit të tij në Pllanë të Lezhës, vajza e tij Viola Prendi ka kërkuar drejtësi për familjen që, brenda 11 viteve, ka humbur katër anëtarë në atentate.
“Kërkoj që të vihet drejtësi për kushërinjtë e mi, vëllanë tim, babanë tim. Të gjenden autorët, të kapen dhe të marrin dënimin e merituar”, u shpreh Viola për Top Channel.
Në 2014 u vranë Taulant Prendi dhe Klodian Ndreca. Në maj 2023 në Athinë u ekzekutua Sidorel Prendi, i njohur edhe si Roan Brahimi, ndërsa së fundmi babai i tij, Gjovalini, u qëllua pranë lokalit ku punonte çdo ditë. “Babai im jetonte i lirë, dilte në rrugë dhe thoshte se nuk i kishte hyrë askujt në hak”, tregoi Viola.
Pas vrasjes në Lezhë, ndodhi një tjetër atentat në Tiranë me 4 të plagosur, ku u dyshua se objektiv ishte bashkëshortja e Sidorelit. Por familja e mohon këtë pistë, duke theksuar se ajo ndodhej në Lezhë në atë kohë. Sidoqoftë, ngjarjet e njëpasnjëshme kanë lënë gjurmë të thella tek më të vegjlit e familjes.
“Kemi fëmijë që janë të terrorizuar, kanë frikë të shkojnë në shkollë. Thonë: ‘Do na vrasin si gjyshin’. Dhe për ne kjo është e tmerrshme”, rrëfeu mes lotësh vajza e viktimës.
Ndërsa policia dyshon për një lidhje mes vrasjes së Gjovalinit dhe të shkuarës së të birit, familja këmbëngul në një version tjetër. Sipas Violës, gjithçka nisi nga një konflikt banal për një femër, dhe autorët janë të njohur: “Rivali i vetëm është Ardian Gjeloshi, i biri Klajd Gjeloshi dhe aleatët e tyre. Ata janë organizatorët e vrasjes së babait dhe vëllait tim. I kam deponuar edhe në polici.”
Ajo mohon përfshirjen e të vëllait në ngjarjet kriminale që i janë atribuar dhe shton se, ndonëse ai kishte njohje me Ervis Martinajn, nuk ishin asnjëherë kundërshtarë.
“Ka marrë një telefonatë nga ai, u revoltua, ka ikur e ka takuar dhe është kthyer po atë darkë. Nuk është dhunuar siç thonë. Ka ardhur, kemi vijuar darkë.”