Zbardhen detaje tronditëse nga ngjarja në Vlorë, ku një 17-vjeçare tentoi t’i jepte fund jetës duke qëlluar veten me armë zjarri në kokë. E reja ndodhet në gjendje kritike në spitalin e Traumës, e intubuar dhe nën mbikëqyrjen e mjekëve, ndërsa ngjarja ka hapur një hetim të thelluar.
Sipas burimeve policore, arma me të cilën dyshohet se është qëlluar adoleshentja nuk është gjetur ende. Familjarët dyshohet se kanë ndërhyrë menjëherë pas ngjarjes, duke fshehur armën dhe gëzhojën dhe duke pastruar vendin e ngjarjes, gjë që ka komplikuar hetimin. Babai i vajzës, me precedentë penalë, është shoqëruar në komisariat për mosbashkëpunim me policinë, ndërsa i janë marrë gjurmë për të verifikuar nëse ka qenë ai që ka përdorur armën.
Dyshimet paraprake të policisë flasin për një debat të ashpër mes babait dhe vajzës, lidhur me stilin e jetesës së saj, që ai nuk e pranonte. Hetuesit nuk përjashtojnë mundësinë që presioni i vazhdueshëm apo konfliktet e shpeshta brenda familjes ta kenë shtyrë vajzën drejt këtij akti ekstrem.
Adoleshentja është rritur nga gjyshërit e saj, të cilët janë aktualisht pranë saj në spital. Ndërkohë, policia vijon hetimet për të sqaruar plotësisht rrethanat e kësaj ngjarjeje të rëndë që ka tronditur opinionin publik.