Një ngjarje tragjike është zbuluar së fundmi në Gjermani ku një mjek 40-vjeçar po përballet me akuza për vrasjen e 15 pacientëve.
Sipas autoriteteve vendase, referuar gjithashtu dhe hetimeve të bëra, ai dyshohet se ka administruar qëllimisht doza vdekjeprurëse të medikamenteve tek pacientë në trajtim paliativ.
Mediat e huaja raportojnë se në lidhje me këtë ngjarje prokuroria gjermane kërkon ndalim të përjetshëm profesional për të dyshuarin, i cili u vu në pranga në gusht të 2024.
Mjeku në fjalë mësohet se ka ushtruar profesionin në disa lande të Gjermanisë, ndërsa thuhet se emri i tij nuk është bërë publik në mënyrë që të ruhet privatësia e tij.
Burimet bëjnë me dije se fillimisht ai u hetuar për katër vdekje të ndodhura vitin e kaluar, që dyshohet se ka tentuar t’i mbulojë duke i vënë zjarrin banesave të viktimave.
Por gjatë hetimeve të kryera janë zbuluar edhe raste të tjera të dyshimta, që datojnë që nga viti 2021.
Autoritetet kanë ngritur një ekip të posaçëm hetimor, i cili po shqyrton të dhënat mjekësore të pacientëve dhe ka planifikuar zhvarrime për të zbardhur shkaqet e vërteta të vdekjes.
Nga ana tjetër thuhet se i dyshuari i mohon akuzat që rëndojnë ndaj tij.