Kevin Kurti, 37 vjeç, i kërkuar ndërkombëtarisht për trafik ndërkombëtar droge, u ekstradua këtë të martë nga Durrësi në Romë, në kuadër të mega-operacionit antidrogë “Liga e Kampionëve”. Kurti akuzohet si një nga figurat kyçe të një rrjeti transnacional që trafikonte kokainë dhe hashash nga Holanda e Spanja drejt provincës së Napolit, duke përdorur telefona të koduar dhe struktura të organizuara kriminale.
Ai u kap më 5 shkurt në Shqipëri, pasi i shpëtoi arrestimit fillestar më 17 janar gjatë një vale ndalimesh në Itali. Ekstradimi i tij u realizua falë bashkëpunimit të Policisë Shqiptare, Karabinierëve italianë dhe Europolit. Prej sot, ai ndodhet në paraburgim në dispozicion të Drejtorisë Antimafia në Napoli.